Kreyòl Enfo, 8 mas 2019 .- Pastè Estiverne Jean Charles jwenn arèstasyon, madi 6 mas pase a, nan ayewopò entènasyonal Tousen Louvèti, ak 95 mil 700 dola ameriken.
Ajans vantbèfinfo.com ki rapòte enfòmasyon an konfime pastè Jean-Charles ta pral pran avyon pou Etazini nan moman ajan imigrasyon yo mete lapat sou li ak magogo lajan an li te sere nan papye kado.
» Mwen se pastè, m ka vwayeje ak kantite lajan m vle « , se repons rèsponsab legliz la bay ajan fòs lòd nan moman yo t ap poze l kesyon sou rezon ki fè l ap vwayaje ak tout lajan sa. San pèdi tan, polisye yo arete pastè Estiverne Jean-Charles jan lwa novanm 2013 sou blanchiman lajan ak finansman teyoris la egzije sa. Daprè lwa sa okenn moun pa gen dwa rantre oubyen kite peyi ak plis pase 400 mil goud.
Pastè Estiverne Jean Charles k ap Direksyon Santral Lapolis Jidisyè (DCPJ) t ap dirije yon legliz Dèlma 33.
Kreyòl Enfo