Kreyòl Enfo, 18 me 2020 .- Patrice Célestin ak Guy Numa se non 2 militan politik lapolis arete, jodi lendi a (18), nan zòn Dèlma 31. Militan sa yo jwenn arèstasyon yo pandan manifestasyon yon branch nan opozisyon an t ap òganize kont pouvwa a Tèt Kale a.
Gwo eskonbrit te pete sou wout Dèlma a aprè arèstasyon militan yo. Pwotestatè yo ki t ap kritike fason prezidan Jovenel Moise ap jere epidemi kovid-19 la te tire anpil wòch sou fòs lòd yo ki yo menm te itilize gaz lakrimojèn epi tire anpil katouch pou kouri dèyè manifestan yo.
Pwofesè Josué Mérilien pase yon move moman tou pandan manifestasyon sa. Sendikalis la resevwa anpil pataswèl anba men polisye yo.
Plizyè avoka ki pwòch Sekrè Demokratik Popilè a deja tanmen demach pou libere militan politik ki fèmen nan gadavi Komisarya Dèlma 33.
Lapolis, sou lòd komisè gouvènman Pòtoprens la, te deside kraze manifestasyon an pou anpeche, daprè sa yo di, epidemi kowonaviris gaye nan peyi a.
Kreyòl Enfo