Lapin pran kontwòl primati, Jovenel Moise al rankontre Donald Trump Etazini

Kreyòl Enfo, 21 mas 2019 .- Yon ti tan aprè enstalasyon Jean Michel Lapin kòm premye minis, Prezidan Jovenel Moise akonpaye ak madanm li Martine Moise pran avyon, aprè midi jedi (21), pou patisipe nan yon rankont ak prezidan ameriken an, Donald Trump, nan Eta Florid, Etazini.

Dirijan peyi Bahamas, Jamayik, Sent Lisi ak Repiblik Dominikèn pral patisipe tou nan rankont sa k ap dewoule, demen vandredi 22 mas la, sou sekirite, ekonomi, gouvènans ak politik etranjè.

Prezidan ameriken an pral remèsye tou dirijan peyi Karayib yo ki toujou pote kole nan batay pou lapè ak demokrasi, daprè yon kominike biwo kominikasyon Laprezidans amerikèn.

Prezidan Jovenel Moise òganize, avan li pran avyon, 36e konsèy minis yo kote li prezante premye minis pou yon ti bout tan an, Jean Michel Lapin.

Kreyòl Enfo