Kreyòl Enfo, 22 fevriye 2021.- Reprezantan sektè sendika nan konsèy elektoral ki la pou yon ti bout tan an (KEP), Patrick Numa, mouri yèswa dimanch 21 fevriye 2021 an. Daprè enfòmasyon ki rive jwenn redaksyon Kreyòl Enfo (KE), sendikalis la rann dènye souf li aprè yon aksidan vaskilè serebral (AVC).
Depi nan mwa desanm 2020, Patrick Numa t ap soufri anba maladi. Li te oblije al pran laswenyay nan peyi Kiba. Ansyen dirijan nan Òganizasyon jeneral endepandan travayè ayisyen yo (OGITH, sig nan lang franse) te retounen nan peyi a 17 fevriye 2021 an malgre kondisyon li pat vrèman amelyore.
Patrik Numa mouri nan moman Konsèy elektoral pou yon ti bout tan an ap fè mannèv pou òganize yon referandòm nan peyi a nan lide pou chanje konstitisyon 1987 la. Sepandan, majorite sektè kontinye denonse KEP sa yo di ki monte deyè do lalwa.
Kreyòl Enfo