Kreyòl Enfo premye jen 2020 .- Rèsponsab Direksyon Sikilasyon ak Polis Woutyè a (DCPR, sig nan lang fransè), komisè Carmel Florent mouri aswè dimanch 31 me 2020 an. Pòt pawòl Polis Nasyonal Ayiti a (PNH) Michel-Ange Louis Jeune ki konfime enfòmasyon an presize komisè divizyonè a rann dènye souf li sou kabann yon lopital nan kapital la.
Michel-Ange Louis Jeune eksplike yo te transpòte rèsponsab DCPR a lopital 30 me pase a aprè li te fin santi li pa byen. Komisè Carmel Florent te gen gwo difikilte pou respire nan moman yo t ap kouri ak li lopital la.
Pòt pawòl lapolis la siyale viktim nan te deja ap soufri ak maladi sik (dyabèt). Toutfwa, Michel-Ange Louis Jeune konfime gen tès ki pral fèt sou kadav la pou detèmine si se kovid-19 ki touye komisè divizyonè a ki te pran tèt Direksyon Sikilasyon ak Polis Woutyè nan lane 2017.
Plizyè gwo zotobre nan zotobre nan Polis Nasyonal Ayiti a kontamine ak nouvo Kowonaviris la pami yo direktè jeneral enstitisyon an Normil Rameau ansanm ak enspektè jeneral la Hervé Julien. Plizyè ajan deja pèdi lavi yo tou akoz epidemi an.
Kreyòl Enfo