Lajistis mete manda pou arete Vladimir Paraison, palè nasyonal revoke l

Pòtoprens, jedi 29 novanm 2018 .-Kowòdonatè jeneral sekirite palè nasyonal, Vladimir Paraison jwenn revokasyon li, daprè enfòmasyon Direktè Jeneral Lapolis la, Michel-Ange Gédéon konfime pou jounal Le Nouvelliste.

Jij enstriksyon Dieunel Lumerant mete manda pou arete Vladimir Paraison nan kad ankèt l ap mennen sou dosye dividal gwo zam otorite yo te dekouvri Senmak, nan lane 2016.

Direktè Michel Ange Gedeon eksplike se sou demann sekretè jeneral palè nasyonal la, Jean Hilbert Lebrun, Vladimir Paraison jwenn revokasyon li kòm kowòdonatè jeneral sekirite palè a.

Menm jan ak ansyen direktè jeneral enstitisyon lapolis la, Godson Orélus, ansyen ministè enteryè ak kolektivite teritoryal la sou administrasyon Michel Joseph Martely, Réginald Delva sispèk kòm konplis nan trafik zam ilegal, asosyasyon malfektè.

8 septanm nan lane 2016 otorite te sezi nan waf Senmak la anviwon 150 fizi kalib 12, 9 fizi kalib douz ak 2 kanon, 5 fizi m4, 15 minòt, 10 bòt, 50 kès katouch kalib 38, 4 kès katouch 9 mm, 10 kès katouch 12, elatriye.

Dalès Buteau