Lajistis bloke lajan gwo chabrak non yo site nan dosye PetwoKaribe a

Kreyòl Enfo, 26 mas 2019 .- Jij enstriksyon k ap travay sou dosye PetwoKaribe a, Ramoncite Accimé, pran mezi pou bloke lajan labank ak byen kèk gwo chabrak ansanm ak antrepriz ki gen non yo site nan rikizitwa komisè gouvènman Pòtoprens la te fè sou dosye a, daprè enfòmasyon Fondasyon Je Klere di li jwenn nan bon ti mamit.

Pami gwo zotobre ki tonbe anba mezi sa gen ansyen Premye minis Laurent Salvador Lamothe ak Jean Max Bellerive, ansyen minis Ekonomi ak Finans, Wilson Laleau ak Marie Carmelle Jean Marie, minis Jacques Gabriel, Stéphanie Balmyr Vildrouin, ansyen Direktè BMPAD Michael Lecorps ak Eustache Saint-Lot.

Jij Ramoncite Accimé mande Inite k ap lite kont kòripsyon (ULCC) pou bay rapò sou patrimwàn (byen ak lajan) ansyen otorite sa yo te deklare nan moman yo t ap rantre ak lè yo t ap soti nan pòs la.

Responsab Fondasyon Je Klere a, Marie Yolène Gilles, ki di l ap swiv dosye a ak anpil atansyon swete mezi sa yo ap ede limyè fèt sou tout lajan ki gagote nan kad pwogram PetwoKaribe a.

Kreyòl Enfo