Krim : sanginè touye epi boule yon jèn polisye Miragwàn

Pòtoprens, vandredi 23 novanm 2018 .- Atoufè touye epi boule mèkredi 21 novanm nan polisye Jocelyn Charles, ajan 4, ki t ap travay nan komisarya 《 Lèziwa》pandan li t ap rantre nan kapital la. Yon enfòmasyon direktè depatmantal Nip nan Lapolis la, komisè divizyonè Frantz Lerebourg konfime.

Enfòmasyon ki rive jwenn Kreyòl Enfo fè kwè se yon gwoup endividi ki te bloke wout nasyonal nimewo 2 a nan zòn 《 Savann Wès》pandan yon pwotestasyon ki ta komèt krim nan.

Polisye viktim nan ki t ap soti nan Nip ta pwoche pou tante konvenk pwotestatè yo kite machin pase nan zòn nan ki twouve l nan mitan Chalon ak Kalfou Deriso. Zagoloray yo ki te move kou kong louvri kout zam sou Jocelyn Charles ki mouri lapoula. Touswit aprè, sanginè mete dife sou kadav viktim nan. Sa fè kèk tan depi gen gwo latwoblay nan lokalite Chalon ki nan komin Miragwàn.

Jocelyn Charles fè dezyèm polisye bandi touye epi boule pandan semèn nan. Lendi pase a, atoufè te poze menm zak la sou ajan CIMO Durosier Jurond nan katye Lasalin, Pòtoprens.