Kreyòl Enfo, 25 me 2020 .- Yon lòt sitwayen kontamine, ayè dimanch la, ak nouvo Kowonaviris la (Sars-CoV-2) nan pak endistriyèl Karakòl la (Nòdès). Sendikalis Télémaque Pierre ki konfime enfòmasyon an presize moun ki fenk kontamine a se yon sitwayen etranje.
Pòt antrepriz kote biwo sitwayen etranje sa ye a te rete fèmen jodi lendi a, daprè Télémaque Pierre. Pwofesyonèl lasante yo pran dispozisyon pou dezenfekte espas la. Yo konseye moun ki te gen kontak ak sitwayen sa tou pou rete nan karantèn.
Ofisyèlman kovid-19 deja enfekte twa (3) moun k ap travay nan pak endistriyèl Karakòl la. De (2) premye yo, yon sipèvizè ak tout madanm li, te kontamine semèn pase a.
Rèsponsab plizyè sendika nan peyi a kwè otorite yo ta dwe fèmen pak endistriyèl Karakòl la pou anpeche viris la gaye plis toujou espas sa kote plizyè mil moun ap travay.
Kreyòl Enfo