Home Aktyalite Kowonaviris : yon jiris kontamine, MSPP mande fèmen tribinal depè seksyon Nò Pòtoprens la

Kowonaviris : yon jiris kontamine, MSPP mande fèmen tribinal depè seksyon Nò Pòtoprens la

by Kreyòl Enfo

Kreyòl Enfo, 9 avril 2020 .- Tribinal depè seksyon Nò Pòtoprens la fèmen akoz yon jiris kontamine ak nouvo kowonaviris la, daprè enfòmasyon Asosiyasyon nasyonal jij ayisyen yo (ANAMAH, sig nan lang franse) konfime.

Ministè sante piblik ak popilasyon (MSPP) bay lòd pou fèmen lokal tribinal la paske jiris ki kontamine a te gen kontak ak avoka, jij ansanm ak lòt moun k ap travay nan tribinal la. MSPP mande tout moun (jij ak avoka) ki te nan tribinal la dènye jou sa yo rete lakay yo jiskaske yo fè egzamen pou kovid-19.

Asosiyasyon nasyonal jij ayisyen yo (ANAMAH, sig nan lang franse) di li gen gwo kè sote aprè nouvèl sa. Prezidan asosiyasyon an, Mèt Jean Wilner Morin, mande jij nan dizuit jiridiksyon peyi a pran anpil prekosyon epi swiv konsèy otorite lasante yo.

2 moun deja mouri, 30 enfekte ak nouvo kowonaviris la Ayiti, daprè dènye bilan pandemi an Ministè sante piblik ak popilasyon pibliye jodi a. Ak 19 ka, lwès se depatman ki plis touche nan peyi a.

Kreyòl Enfo

0 comment