Kreyòl Enfo, 30 jen 2020.- Yon ansanm òganizasyon politik ki nan opozisyon ak pouvwa Tèt Kale a menase, pandan yon konferans jodi madi a, pou pote plent devan lajistis kont Premye minis la, Joseph Jouthe, ansanm ak minis Sante piblik la, Greta Roy, pou gagòt yo fè nan lajan Ayiti te resevwa pou konbat epidemi Kowonaviris la.
Rèsponsab òganizasyon politik sa yo akize Joseph Jouthe kòm otorite ki gagote 18 milyon dola vèt ki te debloke pou achte pwodwi ak materyèl pou ede popilasyon an nan moman kriz la. Yo fè kwè tout materyèl sanitè ki rive debake sou tèritwa nasyonal la se èd peyi etranje voye bay Ayiti.
Youn nan pòt pawòl gwoup la, Abel Loreston, mande minis Sante piblik la, Doktè Marie Greta Roy Clément, bay esplikasyon tou sou 200 kabann li te di ki disponib nan lopital yo pandansetan, okenn moun pa konn ki kote kabann sa yo pase. Abel Loreston anonse yo pral depoze plent nan jou k ap vini la yo kont tout moun ki patisipe nan piye kòb kowonaviris la pou regle zafè pèsonel yo.
Rèsponsab òganizasyon politik yo anonse tou mobilizasyon pasifik pou dechouke Jovenel Moise nan tèt Leta a avan 7 fevriye 2021 pral demare nan kat kwen peyi a. Yo denonse prezidan Jovenel Moise yo di k ap siyen yon ansanm dekrè degrenn gòch ki pa marye ak ansanm revandikasyon mas popilè yo.
Pami òganizasyon politik sa yo nou jwenn Movid, AAPA, Anbake pou chanje, Palman popilè ak REMEDH.
Kreyòl Enfo