Kreyòl Enfo, 2 jen 2020 .- Depi jodi madi a, tout aktivite sispann, pou 3 jou, nan palè jistis Pòtoprens la. Yon desizyon dwayen an, Mèt Bernard Saint-vil, pran nan tèt kole ak sendika grefye yo.
Desizyon pran pou fèmen palè jistis Pòtoprens la aprè lanmò grefye Jean Lesly Antoine dimanch 31 me pase a ak tout sentom epidemi nouvo kowonaviris yo. Mèt Bernard Saint-vil di pandan peryòd palè jistis la ap fèmen an pwofesyonèl lasante yo ap pwofite dezenfekte tout lokal la.
Lajistis se youn nan sektè ki sanble plis touche anba epidemi kovid-19 la. Yèswa, rèsponsab sèvis jiridik nan Achiv nasyonal la, Mèt Jean Salnave Exantus, mouri ak tout sentom maladi a.
Kreyòl Enfo