Kreyòl Enfo, 30 mas 2020 .- Plizyè òganizasyon politik ki nan opozisyon ak pouvwa Tèt Kale a anonse pandan yon konferans, lendi 30 mas la, yo pral netwaye lokal 3 lopital nan zòn metwopolitèn Pòtoprens la nan kad batay pou kontrekare kovid-19 la.
Youn nan pòt vwa ansanm òganizasyon politik sa yo, Abel Loreston, panse pwòpte lopital yo ap fasilite travay pwofesyonèl lasante yo k ap genyen pou fè fas ak malad tout kalte pami yo moun ki kontamine ak nouvo kowonaviris la. Abel Loreston mande lameri ak ponpye pote kole pou ede yo fè travay la.
Rèsponsab òganizasyon yo presize mèkredi premye avril yo pral netwaye lopital jeneral. Jedi 2 avril yo se lopital lapè, Dèlma 33, ki pral benefisye sèvis manm òganizasyon yo. Vandredi 3 avril, militan politik yo pral fè lapwòpte nan lopital sanatoryòm. Pami òganizasyon politik sa yo gen Palman Popilè, Movid, Fanm Djanm, Anbake elatriye.
Ministè sante piblik ak popilasyon nan tèt kola ak laboratwa nasyonal presize, jiska lendi 30 mas la, Ayiti gen 15 moun ki kontamine ak nouvo kowonaviris la.
Kreyòl Enfo