Kreyòl Enfo 30 me 2020.- Nouvo kowonaviris la kontinye ap fè viktim nan enstitisyon piblik yo. Nan lanmwit 27 pou louvri jedi 28 me a, yon enspektè polis k ap travay nan depatman kont fwod nan Elektrisite Ayiti (EDH, sig nan lang franse) mouri ak sentòm kovid-19 yo.
Enfòmasyon ki rive jwenn redakasyon Kreyòl Enfo (KE) konfime avan enspektè a mouri li t ap soufri ak lafyèv, kò fèmal, tous epi pwoblèm respiratwa. Ministè Sante Piblik ak Popilasyon ki deja dezenfekte lokal EDH ki nan ri Kapwa a bay lòd pou fèmen depatman kont fwod nan enstitisyon an pou yon peryòd 14 jou.
Pou prekosyon, otorite lasante yo dezenfekte tou lokal EDH ki nan ri Chareron an, sant Pòtoprens. Plizyè anplwaye ki te gen kontak ak enspektè ki mouri ta kòmanse devlope sentom kovid-19 yo, toujou daprè menm sous la.
Kreyòl Enfo