Home Aktyalite Kowonaviris touye 6 polisye ayisyen pandan yon mwa

Kowonaviris touye 6 polisye ayisyen pandan yon mwa

by Kreyòl Enfo

Kreyòl Enfo, 5 jen 2020 .- Sis (6) polisye pèdi lavi yo pandan mwa me a akoz epidemi Kovid-19 la, daprè Pòt pawòl Polis Nasyonal Ayiti a (PNH), Michel-Ange Louis Jeune. Pami polisye nouvo kowonaviris la touye yo gen rèsponsab sèvis Sikilasyon ak Polis Woutyè a, Komisè Carmel Florent ansanm ak chèf CIMO a, Joël Gentillon.

Michel-Ange Louis Jeune ki pat site non lòt polisye ki viktim anba maladi a di li konfime chif sa yo après tès otorite lasante yo fè sou kadav yo. Pòt pawòl la siyale gen 3 lòt polisye ki pèdi lavi yo tou pandan mwa me a.

Nan plizyè depatman, gen polisye k ap soufri ak sentom ki sanble ak epidemi Kovid-19 la. Daprè enfòmansyon ki rive jwenn Kreyòl Enfo, pou pi piti yon polisye nan komisarya Mache Salomon enfekte.

Rèsponsab Sendika Polis Nasyonal Ayiti a (SPNH-17) mande otorite nan Leta a bay polisye yo bon jan ekipman pou pwoteje tèt yo. SPNH-17 raple se polisye ak pwofesyonèl lasante yo ki plis ekspoze anba epidemi an.

Kreyòl Enfo

0 comment