Home Aktyalite Kowonaviris : difikilte pou rèsponsab lasante yo louvri sant izòlman pou resevwa malad yo

Kowonaviris : difikilte pou rèsponsab lasante yo louvri sant izòlman pou resevwa malad yo

by Kreyòl Enfo

Kreyòl Enfo, 28 avril 2020 .- Abitan nan divès komin pa aksèpte otorite yo louvri sant izòlman pou resevwa malad ki kontamine ak nouvo kowonaviris la nan zòn lakay yo. Sitwayen sa yo kwè si gen yon sant izòlman nan katye lakay yo sa pèmet epidemi an gaye nan lantouray yo pi fasil.

Vilaj Solidarite (lwès), rèsponsab lopital Bernard Mevs yo sispann travay sou konstriksyon yon sant pou bay laswenyay espesyalman ak makad kovid-19 yo. Bernard Mevs pran desizyon sa akoz abitan nan zòn nan kanpe ankwa kont konstriksyon sant la.

Yon gwoup abitan nan zòn Chalon, premye seksyon kominal Miragwàn (nip), anpeche, yo menm tou, ouvèti yon sant pou resevwa malad Kovid-19 yo nan ansyen baz Minista a. Sitwayen sa yo di yo pare pou kontrekare nenpòt moun oubyen sektè ki ta vle vin mete malad kolera nan zòn nan.

Anplwaye CAN yo sakaje sant izòlman Gonayiv la

Sitiyasyon difisil tou pou otorite lasante yo nan vil Gonayiv kote yon gwoup anplwaye Sant anbilansye nasyonal (CAN) sakaje espas ki te prepare pou resevwa moun ki enfekte yo. Pwotestatè yo ki t ap reklame lajan yo di Leta ayisyen dwe yo kraze kabann, chèz, biwo ak lòt materyèl ki te nan espas la.

Kowonaviris gentan touye 6 moun nan peyi a epi 76 sitwayen kontamine, daprè dènye bilten ministè sante piblik pibliye lendi 27 avril la. 7 moun ki te enfekte ak viris la gentan geri.

Kreyòl Enfo

0 comment