Home Aktyalite Kowonaviris-Ayiti : yon anplwaye ministè Enteryè ak Kolektivite tèritoryal yo kontamine

Kowonaviris-Ayiti : yon anplwaye ministè Enteryè ak Kolektivite tèritoryal yo kontamine

by Kreyòl Enfo

Kreyòl Enfo, 19 me 2020 .- Ministè Enteryè ak Kolektivite tèritoryal yo (MITC, sig nan lang franse) konfime jodi a (19) gen yon fonksyonè nan sèvis teknik ministè a ki kontamine ak nouvo kowonaviris la, daprè yon kominike ki vin jwenn Kreyòl Enfo (KE). Moun ki enfekte a se yon gason ki gen 40 lane.

Ministè Enteryè ak Kolektivite tèritoryal yo pote tout presizyon sa yo aprè anpil rimè t ap kouri pou fè kwè yon dividal anplwaye nan ministè a te enfekte. Rèsponsab MICT nan tèt kole ak otorite lasante yo mande tout anplwaye ki te gen kontak ak moun ki kontamine a rete nan karantèn lakay yo.

Pwofesyonèl lasante yo pral fè tès kovid-19 pou tout manm pèsonèl sèvis teknik ministè Enteryè ak Kolektivite tèritoryal yo tou, toujou daprè enfòmasyon ki nan kominike a. Dispozisyon deja pran tou pou dezenfekte lokal ministè a.

MICT bay garanti tout dispozisyon deja pran pou pwoteje anplwaye ak sitwayen ki vin chèche sèvis nan ministè a kont maladi a.

Kreyòl Enfo

0 comment