Home Sante Kowonaviris : Ayiti gen plis viktim pase Etazini, Espay ak Lafrans, aprè premye mwa epidemi a.

Kowonaviris : Ayiti gen plis viktim pase Etazini, Espay ak Lafrans, aprè premye mwa epidemi a.

by Kreyòl Enfo

Kreyòl Enfo, 21 avril 2020 .- Ayiti konplete, dimanch 19 avril la, yon mwa depi prezidan Jovenel Moise te anonse gen 2 premye moun ki kontamine ak nouvo kowonaviris la (Sars-CoV-2). Yon mwa aprè premye ka sa yo, Ministè Sante Piblik ak Popilasyon (MSPP) konfime 57 moun gentan kontamine, pami yo 3 mouri.

Nimewo sa yo montre sitiyasyon an ka konplike Ayiti nan mwa me a lè nou konpare yo ak chif pandan menm peryòd la nan lòt peyi kote epidemi an ap fè ravaj nan moman an. Sepandan, espesyalis ki pale ak Kreyòl Enfo (KE) eksplike gen plizyè faktè lokal ak metòd diferan otorite peyi yo adòpte ki ka lakoz konparezon sa yo pa tonbe daplon.

Etazini, otorite yo te konfime premye moun ki enfekte ak kovid-19 sou tèritwa ameriken an 22 janvye, aprè yon mwa te genyen sèlman kenz (15) moun ki kontamine epi zewo (0) mò. Nan moman an, Etazini se peyi kote maladi a ap fè plis dega. Anviwon 50 000 gentan mouri.

Espay, premye ka a te konfime 31 janvye. 30 jou aprè, otorite espanyòl yo te konte 45 moun ki kontamine epi zewo (0) mò. Jodi a, Espay se peyi ki plis touche anba pandemi a sou kontinan ewopeyen an aprè Itali.

Nan peyi Lafrans, otorite yo te dekouvri premye moun ki enfekte ak viris la 24 janvye. Aprè yon mwa, te gen sèlman 17 moun kontamine epi 2 mò sou tèritwa fransè a. Pou kounye a, kovid-19 gentan touye plis pase 20 000 moun nan peyi Lafrans.

Remake pa gen youn nan peyi sa yo pandemi an te kòmanse kontamine epi touye anpil moun avan yon mwa. Chif yo montre, malgre diferans ki genyen nan chak peyi yo, viris la te kòmanse « eksploze » aprè premye 30 jou yo.

Yon enfektolojis ki pale ak Kreyòl Enfo (KE) raple konpare peyi nan dosye epidemi dwe fèt ak anpil prekosyon. Toutfwa, espesyalis la di gade chif nan lòt peyi kapab ede dirijan ayisyen yo ak rès sosyete a pran bon desizyon pou diminye dega pandemi a.

Kreyòl Enfo

0 comment