Kreyòl Enfo, 11 me 2020 .- Ayiti depase ofisyèlman jodi lendi a 200 ka Kovid-19. Ministè Sante Piblik ak Popilasyon (MSPP) presize peyi a deja genyen 209 moun ki kontamine, 27 pandan dènye 24 èd tan yo.
Nan kominike ki pibliye aswè a, otorite lasante yo konfime tou yon lòt moun pèdi lavi l akoz epidemi an ki deja touye 16 moun nan tout peyi a. Dènye viktim Kovid-19 la t ap viv nan depatman Latibonit.
Ak 142 moun enfekte, Lwès se episant epidemi an nan peyi a. Aprè, nou jwenn depatman Latibonit (26) , Nòdès (12), Nò (8), Sidès (7), Sant (4), Nòdwès (3), Nip (3), Sid (2) epi Grandans (2). Mwatye nan moun ki mouri yo tou (8) soti nan depatman Lwès.
Ministè Sante Piblik ak Popilasyon kontinye mande popilasyon an respekte prensip ijyèn ak sekirite yo yon manyè pou anpeche epidemi gaye plis toujou nan peyi a.
Kreyòl Enfo