Kreyòl Enfo, 5 me 2020 .- Pandan lavi kòmanse retounen nan kèk peyi ewopeyen tankou Itali, Espay ak Lafrans, nouvo kowonaviris la (Sars-CoV-2) kontinye ap pran teren nan Wayòm Ini. Nan dènye 24 èd tan yo, 693 moun mouri akoz kovid-19 la.
Pou kounye a, Wayòm Ini genyen 294 990 moun ki deja enfekte ak 29 427 mò. Ak chif sa yo, Wayòm nan depase Itali ki li menm deja konte 29 315 kadav.
Nan kòmansman pandemi a, estrateji gouvènman britanik la te adòpte pou konbat pandemi an te chita sou « mitigasyon » ak » iminizasyon ». Nan teyori, estrateji sa t ap lakoz majorite nan popilasyon an kontamine, sa ki t ap pèmèt yo devlope yon iminite kolektif.
Sepandan, yon gwoup syantifik montre, atravè yon etid, ap gen plizyè milyon moun mouri si Wayòm Ini kontinye ak estrateji sa pou konbat kovid-19 la. Rezilta etid syantifik yo ta pral pouse otorite britanik yo chanje estrateji epi swiv egzanp lòt peyi ewopeyen yo ki te deja nan konfinman.
Kreyòl Enfo