Kreyòl Enfo, 13 me 2020 .- Yon anplwaye nan santral Direksyon nasyonal dlo potab ak asenisman (Dinepa), Petyonvil, mouri madi 12 me 2020 an, aprè li te fin kontamine ak nouvo kowonaviris la, daprè enfòmasyon yon kad nan enstitisyon an konfime pou Kreyòl Enfo (KE).
Aprè lanmò anplwaye sa, Dinepa nan tèt kole ak otorite lasante yo mete tout anplwaye yo nan karantèn. Rèsponsab yo fèmen pòt lokal la pou yo ka dezenfekte l.
Rèsponsab Direksyon nasyonal dlo potab ak asenisman an ki pat vle non l site di « nou poko konnen kilè biwo ap rekòmanse fonksyone ». Li rekonèt « moman an tout moun panike ».
Anplwaye ki mouri a se te yon chofè. Li ta deja ap soufri ak lòt maladi ki lakoz sitiyasyon te pi difisil nan moman viris la enfekte l. Poko gen enfòmasyon ofisyèl tou ki di yo deja antere kadav la.
Kreyòl Enfo