Koukouwouj dèyè Arnel : 2 moun mouri pami yo yon polisye

Kreyòl Enfo, 4 avril 2019 .- Yon polisye ak yon elèv lekòl pèdi lavi yo, jodi jedi 4 avril la, pandan yon operasyon koukouwouj lapolis t ap mennen kont chèf gang Arnel Joseph nan 4e seksyon komin Desalin, depatman Latibonit.

Victor Bellange, 19e pwomosyon, se non polisye ki mouri a. Li te nan Brigad entèvansyon kont ensekirite fonsyè (BRICIF), yon inite nan Lapolis la ki jere dosye konfli tè.

Yon elèv lekòl pèdi lavil pandan operasyon sa tou, daprè enfòmasyon kolaboratè Kreyòl Enfo nan depatman Latibonit la konfime. 2 polisye ak plizyè lòt sitwayen blese tou pandan ajan fòs lòd yo t ap twoke kòn yo ak « solda » Arnel yo.

Chèf gang la ki te gentan chape poul li menase pou bloke depatman Latibonit la. Nan mikwo plizyè radyo nan kapital la, Arnel lanse yon pinga bay otorite yo li di ki ta « dwe wont » pou simagri y al fè dèyè l jouk nan vil Desalin .

Rèsponsab Lapolis yo toujou poko bay yon bilan ofisyèl sou operasyon sa.

Kreyòl Enfo