Kòripsyon : lapolis resevwa lòd pou arete Reginald Boulos epi mennen l bay ULCC

👤 Kreyòl Enfo

Doktè Pierre Reginald Boulos

Kreyòl Enfo, 3 jiyè 2021.- Direktè jeneral Inite k ap lite kont kòripsyon (ULCC, sig nan lang franse), Hans Jacques Ludwig Joseph, bay lapolis lòd, depi vandredi 2 jiyè pase a, pou arete antreprenè Pierre Reginald Boulos epi mennen l devan komisyon ankèt enstitisyon an. Desizyon sa pran nan kad ankèt sou patenarya ONA ak Real business investment Doktè Boulos ap dirije.

Direktè jeneral ULCC a mande tou pou lapolis pibliye avi ak foto Pierre Reginald Boulos nan tout enstitisyon piblik ak tout fwontyè ki pèmèt rantre ak soti nan peyi a. Mèt Hans Jacques Ludwing Joseph apiye sou lwa 12 mas 2014 ak dekrè 8 septanm 2014 la ki kreye ULCC.

»   Ayiti nan kriz, Etazini ankouraje dyalòg epi konseye prezidan Jovenel Moise konbat kòripsyon

Yon lòt kote, nouvo direktè jeneral ONA a, Jenley Marc Jean Baptiste, pibliye depi menm jou vandredi a yon nòt kote li « kondane ak tout fòs detounman yon milyon dola ameriken sosyete Real business investment SA, antrepriz Piere Reginald Boulos ap dirije, nan kad yon fo pwojè konstriksyon lojman sosyal nan zòn Fèmat.

Nan yon twit samdi 3 jiyè 2021 an, Pierre Reginald Boulos kwè pouvwa a ap sèvi ak ULCC pou fè pèsekisyon politik. Responsab pati politik MTVAyiti a ekri  » se pa premye fwa y ap sèvi ak manti, manipilasyon pou enstrimantalize lajistis kont opozan politik.  Se pa premye fwa y ap envante fo dosye pou kouri dèyè dosye krim ak kòripsyon yo. Je nou Kale! Yon jou l ap jou ! Konba a ap kontinye pou yon lòt Ayiti! #YonLòtKalkil ».

»   MTVAyiti denonse pouvwa a k ap sèvi ak ULCC pou pèsikite Doktè Pierre Reginald Boulos

 

Kreyòl Enfo 

Kreyòl Enfo

ou ka enterese