Kominote entènasyonal la vire do bay Claude Joseph epi mobilize dèyè Ariel Henry kòm premye minis

👤 Kreyòl Enfo

Kreyòl Enfo, 17 jiyè 2021.- Kominote entènasyonal la ki te pote tout sipò li bay Claude Joseph depi aprè asasina prezidan Jovenel Moise 7 jiyè pase a sanble chanje pozisyon yo.  Yon semèn aprè Madanm Helen Lalime te fin mande Premye Minis revoke a, Claude Joseph, pou pran kontwòl pouvwa a epi òganize eleksyon, diplomat ki reyini nan « Core Group » yo aliyen yo dèyè Doktè Ariel Henry Jovenel te gentan deziye kòm Premye Minis avan lanmò l.

Nan yon kominike ki pibliye jodi samdi a (17), « Core Group » la ankouraje Premye Minis deziye a, Ariel Henry, pou rapouswiv ak demach pou fòme yon gouvènman ak diferan sektè nan peyi a. Diplomat yo ki raple Ayiti ap fè fas ak yon sitiyasyon malouk swete  » tout aktè politik, ekonomik ak sosyete sivil la pote kole ak otorite nan jefò k ap fèt pou retabli sekirite sou tout tèritwa a sitou nan katye kote bandi ap fè lalwa yo ».

»   Jovenel Moise anonse demach pou chwazi yon lòt Premye minis

Core Group la swete tou òganizasyon eleksyon prezidansyèl ak lejislatif lib, onèt epi transparan nan yon tan ki pa twò long epi pèmèt chak ayisyen benefisye sèvis Leta a dwe yo.

Anbasadè peyi Almay, Brezil, Kanada, Etazini, Frans, Inyon Ewopeyen, Reprezantan Leta Ameriken yo ansanm ak Reprezantan espesyal Sekretè jeneral Nasyonzini yo se ansanm diplomat ki konpoze Core Group la.

Kreyòl Enfo


 

ou ka enterese