Kreyòl Enfo, 21 janvye 2021 .- Gwo mobilizasyon nan komin Kafou (Lwès) nan mitan jounen jedi 21 janvye 2021 an pou denonse dappiyanp (kidnaping) bandi ak zam fè sou yon elèv lekòl kominal Pyè Samo. Viktim nan ki rele Géraldine te nan klas 7e ane fondamantal..
Elèv lise Anri Kristòf k ap manifeste kont kidnaping
Elèv nan lise Anri Kristòf ki revòlte aprè zak sa pran lari pou mande otorite yo pran rèsponsabilite yo. Elèv yo te mache lage plizyè lòt lekòl nan komin nan epi mande konkou kanmarad yo pou fòse rèsponsab nan Leta a tande vwa yo.
Plizyè nan jèn sa yo ki pale ak redaksyon Kreyòl Enfo (KE) eksplike se ak gwo laperèz yo kite lakay yo chak jou pou vin lekòl akoz bandi ak zam k ap taye banda nan peyi a pa chwazi moun pou yo kidnape. Yon sitiyasyon ki ka gen gwo konsekans sou aprantisaj timoun yo, daprè plizyè espesyalis.
Doktè, avoka, polisye, timachann, elèv lekòl…pèsonn pa epanye anba machin ensekirite a nan zòn metwopolitèn Pòtoprens la ak divès lòt depatman nan peyi a. Malgre anpil gwo deklarasyon otorite konsène yo ap fè nan medya, lapolis sanble plis mobilize pou bat jounalis ak kraze manifestasyon olye yo mete lapat sou atoufè ki pa sispann mete dlo nan zye popilasyon an.
Kreyòl Enfo