Home Aktyalite Kidnaping : Doktè Makindi Guerrier, 36 lane, mouri sou kabann lopital Sendomeng

Kidnaping : Doktè Makindi Guerrier, 36 lane, mouri sou kabann lopital Sendomeng

by Kreyòl Enfo

Doktè Makindi Guerrier

Kreyòl Enfo, 13 desanm 2021.- Doktè Makindi Guerrier mouri nan yon lopital Repiblik Dòminikèn, matin dimanch 12 desanm nan, yon semèn aprè li te viktim pandan bandi t ap tante kidnape l ak tout madanm li nan zòn Bwa Vèna, Pòtoprens. Dantis la ki te rive chape anba men kriminèl yo te resevwa plizyè katouch.

Malgre anpil mannèv pou mennen li lopital Kiba, Makindi Guerrier te oblije rete ap pran laswenyay Repiblik Dòminikèn annatandan yo transfere l, daprè kòlèg li Doktè Garnel Michel.

Doktè Makindi Guerrier te gen 36 lane. Li te gen yon klinik sou Bwa Vèna a, tou pre kote atoufè yo t ap tante fè dapiyanp sou li a. Li te konn anime tou yon ribrik sante nan Radyo ak Televizyon Karayib.

Lanmò jèn pwofesyonèl sa endiye divès sektè nan sosyete a. N ap raple se prèske chak jou sitwayen ap viktim anba bal bandi nan zòn metwopolitèn Pòtoprens la anba bab otorite yo ki pa fè anyen pou soulaje popilasyon an.

Kreyòl Enfo

0 comment