Home Aktyalite Kafou : Pitit Desalin dezenfekte lokal enstitisyon Leta, mache piblik epi sansibilize sitwayen kont kovid-19

Kafou : Pitit Desalin dezenfekte lokal enstitisyon Leta, mache piblik epi sansibilize sitwayen kont kovid-19

by Kreyòl Enfo

Kreyòl Enfo, 2 jen 2020.- Kanpay sansibilizasyon pati politik Pitit Desalin lanse nan tout peyi a ap rapouswiv. Jodi madi 2 jen an, ekip teknik Pitit Desalin yo dezenfekte lokal plizyè enstitisyon Leta ak mache piblik nan komin Kafou, depatman Lwès.

Militan Pitit Desalin k ap dezenfekte yon lokal nan komin Kafou

Pami enstitisyon piblik Pitit Desalin dezenfekte nan komin Kafou nou ka site mache Bizoton, DINEPA, Direksyon Jeneral Enpo (DGI), komisariya ak OAVCT. Pwofesyonèl ki te nan delegasyon an distribiye pwodwi tou pou sitwayen yo trete dlo y ap sèvi.

Ekip teknik la te pwofite fè fòmasyon tou pou militan pati a ki nan komin Kafou sou ki pi bon mwayen yo ka pwoteje tèt yo kont kovid-19 la.

Kòdonatè kominal Pitit Desalin nan, Mèt Henry Claude Josaphat raple epidemi kowonaviris la se yon malè ki pandye sou tèt chak grenn sitwayen. Li konseye abitan Kafou yo rèspekte tout konsèy otorite lasante yo yon manyè pou yo pa trape maladi a.

Lidè Pitit Desalin nan, Jean Charles Moise, ki pat prezan nan komin Kafou anonse demen madi a karavàn sansibilizasyon kont kovid-19 la ap debake Gresye avan yo pran direksyon rejyon sid peyi a.

Kreyòl Enfo

0 comment