Kadav gaye sou pil fatra Lasalin, sitwayen yo mande sekou Lapolis

Sitiyasyon an malouk nan katye Lasalin ak lantouray li kote bandi pa sispann twoke kout zam.

Imaj k ap sikile sou rezo sosyal yo, mèkredi 14 novanm nan, montre kadav pase 10 moun ki gaye sou pil fatra. Tout aktivite bloke nan zòn nan. Mache Kwabosal ak Lasalin pa fonksyone akoz laperèz ki anvayi ti machann.

Kèk abitan zòn nan ki rive pale ak Kreyòl Enfo nan telefòn kritike Lapolis yo di ki bay bandi yo legen. Sitwayen sa yo fè kwè lodè kadav anvayi tout zòn nan.

Militan politik Rony Timothé akize pouvwa a kòm prensipal responsab sitiyasyon k ap pase anba Lavil la. Responsab Viv Ayiti a lonje dwèt sou delege depatmantal Lwès la, Pierre Richard Duplan ak Ronsard St -Syr kòm moun k ap mache distribiye zam ak lajan bay bandi nan zòn nan.