Home Aktyalite Kadav atè nan lari : sitiyasyon kritik nan peyi Ekwatè akoz nouvo kowonaviris la

Kadav atè nan lari : sitiyasyon kritik nan peyi Ekwatè akoz nouvo kowonaviris la

by Kreyòl Enfo

Kreyòl Enfo, premye avril 2020 .- Nan peyi Ekwatè, ofisyèlman otorite yo konfime ayè madi a nouvo kowonaviris la deja kontamine 2 302 moun epi touye 79 sitwayen. Men, reyalite ki nan vil tankou Guayaquil montre kantite moun ki mouri yo depase chif otorite yo pataje.

Sou rezo sosyal yo, plizyè ekwatoryen montre kadav fanmi yo ki simaye atè nan lari paske anbilans pa vin pran yo. Sèvis « anbilans yo depase tèlman gen ijans pou pran moun ki enfekte mennen lopital », daprè majistra Guayaquil la, Cyntia Viteli. Plizyè fanmi denonse otorite yo ki pran 3 jiska 5 jou avan yo voye anbilans vin pran mò yo alòske yon entèdi moun antere fanmi yo.

Nan Ekwatè, gouvènman an dekrete yon « eta ijans » kote otorite yo sispann tout reyinyon ak lantèman menm si moun ki mouri yo pat enfekte ak nouvo kowonaviris la. Se Leta ki dwe antere tout moun ki mouri nan peyi a.

Minis Gouvènman an, Maria Paula Romo, eksplike otorite yo ranmase plis pase 100 kadav pandan 2 jou nan pwovens Guayaquil. Minis la raple se nan tout peyi a moun ap mouri.

Sitiyasyon an kritik tou nan lopital yo. Plizyè sitwayen ki santi sentom kovid-19 la oblije kouche atè nan lakou lopital ak sant sante yo Guayaquil. Gen lopital se depi nan lakou a pwofesyonèl lasante yo mete aparèy rèspiratwa pou malad yo.

Pandemi an gentan touye pase 400 moun nan zòn Amerikdisid la, yon rejyon ki gen anpil migran Ayisyen.

Kreyòl Enfo

0 comment