Kreyòl Enfo, 9 fevriye 2019 .- Prezidan Jovenel Moise voye jete, ayè vandredi a, tout posibilite pou l ta demisyone, malgre sitiyasyon latwoublay ki genyen nan kapital la ak plizyè lòt vil pwovens.
Chèf Leta a mande lidè ki nan opozisyon an rèspekte konstitisyon an epi prepare yo pou eseye pran pouvwa a pandan eleksyon pou pòs prezidan ki pral dewoule nan lane 2021.
Jovenel Moise, yon lòt fwa ankò, envite opozisyon patisipe nan dyalòg gouvènman an te lanse a. Pou prezidan Moise, yon bon chita pale nan mitan tout sektè nan peyi a se sèl mwayen ki ka retire Ayiti nan kriz l ap travèse jounen jodi a.
Chèf Leta a fè deklarasyon sa yo aprè yon rankont ak komèsan ki achte diri nan peyi etranje pou gade kòman yo ka bese pri a sou mache lokal la.
Depi 7 fevriye, gwo katchouboumbe pete nan kapital la ak divès lòt vil pwovens kote gen anpil manifestasyon ak vyolans pou fòse Jovenel Moise kite pouvwa a.
Kreyòl Enfo