Home Aktyalite Jovenel Moise pwomèt 3 000 goud : yon premye gwoup 22 888 moun resevwa, daprè Digicel

Jovenel Moise pwomèt 3 000 goud : yon premye gwoup 22 888 moun resevwa, daprè Digicel

by Kreyòl Enfo

Kreyòl Enfo, 2 me 2020 .- Digicel anonse, nan yon kominike vandredi premye me a, gouvènman an deja idantifye yon premye gwoup 22 888 moun ki pral benefisye 3 000 goud nan telefòn yo atravè sèvis «Mon Cash». Jovenel Moise te pwomèt 1,5 milyon fanmi pral benefisye asistans ekonomik sa pou ede yo fè fas ak kriz kovid-19 la.

Konpayi telekominikasyon an pwofite kominike sa pou voye yon pinga bay tout move lawon ki ta gen lentansyon vin fè kòken nan pwosesis la. Digicel mande sitwayen yo pa okipe okenn mesaj (SMS) oubyen moun k ap rele nan telefòn pou di yo pami moun k ap benefisye 3 000 goud la.

Kominike a presize moun k ap jwenn 3 000 mil goud la ap resevwa yon mesaj sou non « Mon Cash » men se pa sou yon nimewo mesaj la ap vin jwenn benefisyè yo. Digicel eksplike menm si yon moun poko janm itilize sèvis «Mon Cash» la non li gen dwa nan lis la moun k ap benefisye yo.

Anpil kesyon ap poze sou kritè gouvènman an itilize pou chwazi benefisyè yo. Nan plizyè komin, reprezantan pouvwa Tèt Kale a ap pran non moun ak tout nimewo Kat idantikasyon nasyonal yo (KIN) sou pou mete non yo nan lis moun ki pral jwenn lajan sa.

Kreyòl Enfo

0 comment