Kreyòl Enfo, 6 desanm 2019 .- Jounalis espòtif Michel Giraud ki t ap travay nan radyo Galaksi mouri lakay li, douvanjou vandredi a (6), aprè yon kriz opresyon.
Michel Giraud, 77 lane, se youn nan pi ansyen kwonikè espòtif peyi a te genyen. Li te kòmanse prezante emisyon espò nan radyo Galaksi depi 1992. Li te konn prezante yon emisyon chak dimanch maten ki rele « La messe dominicale ».
Kaptèn Giraud, jan fanatik ak kolaboratè li yo te toujou rele l, « se te yon bibliyotèk vivan, yon espesyalis nan zafè estatistik nan espò sitou foutbòl », daprè youn nan kolaboratè li yo.
Asosiyasyon jounalis espòtif ayisyen yo (Ashaps) pa kache tristès yo aprè nouvèl lanmò sa. Nan yon nòt pou laprès, Ashaps siyale absans Kaptèn Giraud ap kite yon gwo vid nan peyi a.
Kreyòl Enfo