Jounalis ap sibi menas ak zak vyolans, AJH mande konkou lajistis

Pòtoprens, madi 27 novanm 2018 .-Asosyasyon jounalis ayisyen yo (AJH) gen gwo kè sote pou kriz politik k ap brase bil peyi a dènye jou sa yo. Nan yon nòt jodi madi a (27), rèsponsab AJH yo mande otorite lajistis yo pran tout dispozisyon pou pwoteje jounalis yo.

Sekretè jeneral AJH la, Jacques Desrosiers ki di li sispèk kriz politik la vle divize laprès tankou jan sa te ye nan lane 2004 konseye tout jounalis fè travay yo ak anpil sans pwofesyonèl.

Jacques Desrosiers pwofite mande patizan tout sektè politik nan peyi a pou pwoteje epi rèspekte travayè laprès yo.

N ap raple pandan moman latwoublay la, vandredi 23 novanm pase a, jounalis-repòte radyo Melodie fm, Raynald Petit-Frère viktim anba plizyè moun ki di yo se sipòtè Pati ayisyen tèt Kale (PHTK) nan zòn mòn Laza, Petyonvil.

Raynald Petit Frère eksplike se pandan li te fin kouvri manifestasyon opozisyon an t ap òganize nan kapital la yon gwoup nèg ki maske figi yo mete l nan mitan epi pase l plizyè pataswèl sou pretèks li se jounalis k ap pouse popilasyon manifeste ak vyolans.

Lunie Joseph, jounalis radyo Zenith fm, di l ap resevwa tou anpil menas ak pawòl demeplè sou rezo sosyal yo. Depi aprè gwo manifestasyon 18 novanm pase a, Lunie Joseph endike endividi ki kache dèyè telefòn ak nimewo kache pa sispann fè menas sou lavi l.