Home Aktyalite Jean Charles Moise nan tèt yon karavàn distribisyon ak sansibilizasyon kont kowonaviris

Jean Charles Moise nan tèt yon karavàn distribisyon ak sansibilizasyon kont kowonaviris

by Kreyòl Enfo

Kreyòl Enfo, 21 me 2020 .- Lidè Pitit Desalin nan, Jean Charles Moise, ap rapouswiv ak distribisyon ekipman epi kontinye sansibize popilasyon an pou ede yo pwoteje tèt yo kont epidemi kovid-19 la. Yon ekip teknik akonpaye ansyen kandida pou pòs prezidan an pandan karavàn sa ki vize pase nan tout depatman yo.

Jean Charles Moise ak ekip li pandan yon distribisyon mask nan vil Wanament ( Foto koutwazi)

Jodi jedi 21 me a, Jean Charles Moise ak ekip li te debake nan vil Wanament (Nòdès). Youn nan manm ekip la presize yo distribisyon mask ak safi, yon pwodwi pou trete dlo, bay plizyè milye moun ki te soti nan divès seksyon kominal ak katye kote sitiyasyon sosyal ak ekonomik yo pi difisil.

Ansyen senatè Nò a dezenfekte plizyè batiman komisarya ak lokal lòt enstitisyon piblik nan tout zòn kote yo deja pase yo. Gen lokal antrepriz prive yo ta dezenfekte tou, daprè sa divès kolaboratè Kreyòl Enfo (KE) konstate.

Karavàn Pitit Desalin nan deja pase nan divès depatman pami yo Latibonit, Nò ak Nòdès. Jean Charles Moise eksplike pandan pasaj karavàn nan, ekip teknik ki akonpaye l la, pwofite eksplike sitwayen yo ki pi bon mwayen pou yo pwoteje tèt yo kont epidemi an.

Demen vandredi a, Pitit Desalin ta dwe distribiye mask ak lòt kalte pwodwi nan komin Plezans, Kankòk ak Pòdepè. Jean Charles Moise pwomèt pou devwale, nan jou k ap vini la yo, ki peyi oubyen sekrè ki bay bourad lajan ak materyèl pou mennen karavàn sa.

Kreyòl Enfo

0 comment