Kreyòl Enfo, 18 me 2020 .- Yon gwoup endividi otorite yo poko idantifye mete dife, aswè dimanch 17 me a, nan sant otorite yo prepare pou resevwa malad Kovid-19 yo nan vil Jakmèl. Yon bon pati nan lokal la pase anba flanm dife.
Daprè enfòmasyon ki rive jwenn Kreyòl Enfo (KE), se anviwon 10 jèn gason ki kraze baryè prensipal lokal la, sakaje tout sa yo jwenn epi mete dife nan espas a la. Bandi yo komèt zak sa bò 8tè nan aswè, daprè yon abitan nan zòn ki regrèt lapolis poko rive mete lapat sou menm youn nan endividi sa yo.
Ofisyèlman, 12 moun deja kontamine ak nouvo kowonaviris la nan depatman Sidès la. Okenn malad pat nan sant la nan moman endividi yo t ap komèt krim nan.
Se ansyen baz Minista te genyen nan vil Jakmèl otorite prepare pou fè sant karantèn sa.
Kreyòl Enfo