Kreyòl Enfo, 23 septanm 2019 .- Jounalis fotograf Dieunalio Chéry ansanm ak 2 lòt sitwayen blese anba bal, maten lendi a (23), nan lakou palman ayisyen an, sou bisantnè.
Premye enfòmasyon ki rive jwenn Kreyòl Enfo fè kwè se senatè Ralph Fethière ki ta rale zam epi tire sou yon gwoup moun nan lakou palman an. Reprezantan depatman Nò a ki rekonèt li te tire nan espas la eksplike, nan mikwo radyo Mega, se yon mannyè pou l te ka defann tèt li kont « chimè ak zam » ki te atake l.
Palmantè a ki » regrèt sak pase a » di li pat konnen si gen yon jounalis ki blese.
Jounalis fotograf Dieunalio Chéry travay pou plizyè medya entènasyonal pami yo Associeted Press (AP). Li resevwa plizyè pri pou kalite foto ak evènman li kouvri nan peyi a.
Lòt 2 moun ki blese anba bal yo ta yon polisye ak yon militan.
Kreyòl Enfo