Kreyòl Enfo, 7 jen 2020 .- Enspektè prensipal Meradieu Jean-Baptiste ta touye tèt li, aprè midi a, nan vil Gonayiv, depatman Latibonit. Youn nan rèsponsab komisarya Gonayiv yo fè kwè enspektè ki mouri a ta gen pwoblèm sikolojik.
Pòt pawòl Polis nan depatman Latibonit, enspektè Dieudonné François, eksplike se « bò 4trè aprè midi polisye ki te nan komisarya a tande yon bri katouch nan lakou a, lè yo kouri al gade yo jwenn enspektè a blayi sou do ak zam li bò kote l ». Pòt pawòl Polis Latibonit la presize enspektè Meradieu Jean-Baptiste mouri pandan kòlèg li yo t ap kouri ak li lopital.
Lapolis nan Latibonit di yo pa gen twòp eksplikasyon sou rezon ki ta pouse enspektè Meradieu Jean-Baptiste touye tèt li. Toutfwa, pòt pawòl polis Latibonit la di yon fanmi viktim nan ki te «vin depoze l nan komisarya sou bisiklèt rapòte enspektè Meradieu Jean-Baptiste abitye repete li pa wè poukisa li kontinye ap viv».
Kadav enspektè polis la deja ap glase nan yon mòg nan site lendepandans la. Meradieu Jean-Baptiste ki te rèsponsab komisarya Ench la te fenk transfère nan vil Gonayiv jedi pase a.
Kreyòl Enfo