Kreyòl Enfo, 25 janvye 2021 .- Dram nan komin Monwi (Latibonit), aprè midi lendi a (25), kote yon elèv lise nasyonal komin nan pèdi lavi l anba bal nan zòn Soukolas. Viktim nan ki resevwa yon bal nan kou mouri lapoula.
Daprè enfòmasyon yon abitan nan zòn nan pataje ak redaksyon Kreyòl Enfo (KE), ensidan sa rive pandan yon chite pit nan mitan 2 chofè machin. Chofè ki ta tire jèn demwazèl la gentan chape pou l li. Toutfwa, fòs lòd yo gentan arete 2 lòt endividi ki te akonpaye l.
Pou kounye a (3è45) popilasyon an bloke wout nasyonal nimewo 1 an pou reklame jistis pou viktim nan. Anpil kawoutchou ap boule. Yon sitiyasyon ki anpeche sikilasyon machin fèt sou wout nasyonal la.
Jèn elèv sa pedi lavi l nan moman kote plizyè milye kamarad li ap manifeste nan zòn metwopolitèn Pòtoprens la kont fenomèn kidnaping lan ki pa epanye pèsonn.
Kreyòl Enfo