Kreyòl Enfo, 25 me 2020 .- Federasyon entènasyonal foutbòl asosyasyon (FIFA, sig nan lang franse) sispann Prezidan federasyon ayisyèn foutbòl la, Doktè Yves Jean-Bart, nan tout aktivite foutbòl pou yon peryòd 90 jou. Dadou Jean-Bart tonbe anba sanksyon sa aprè eskandal seksyèl nan Sant Kwadèboukè a.
Pi gwo enstans foutbòl mondyal la pran presize komisyon etik la sispann Doktè Yves Jean-Bart sou baz atik 84 ak 85 « FIFA Code of Ethics » la. Prezidan federasyon ayisyèn foutbòl la pap ka patisipe nan okenn aktivite foutbòl annatandan rezilta ankèt komisyon etik FIFA ap mennen sou seri akizasyon k ap peze sou do l kòm kwa li ta fè kadejak sou plizyè jèn foutbolè fanm nan Sant Kwadèboukè a.
Eskandal seksyèl sa pete aprè yon atik jounal britanik « The Guardian » pibliye nan kòmansman mwa me a. Nan atik sa, jounalis yo rapòte plizyè temwayaj kote yo akize Dadou Jean-Bart kòm rèsponsab k ap fè abi seksyèl sou jenn fanm ki nan Sant Camps Nous an nan komin Kwadèboukè.
Kreyòl Enfo