Kreyòl Enfo, 18 me 2020 .- Ansyen senatè depatman Grandans epi manm Sektè Demokratik Popilè a, Saurèl Jacinthe, konfime li kontamine ak nouvo kowonaviris la. Nan yon videyo li pibliye sou rezo sosyal yo, ansyen prezidan chanm depite a di li te fè tès kovid-19 la depi samdi aprè li te fin santi kèk sentom.
Senatè Saurèl Jacinthe ki sanble pa santi twòp gwo doulè ap pase peryòd karantèn nan lakay li. Ansyen palmantè a di li gen 3 jou depi li kòmanse karantèn nan.
Manm Sektè Demokratik Popilè a konseye tout moun pran prekosyon epi swiv konsèy otorite lasante yo pou yo pa trape maladi a. Li raple kowonaviris ka enfekte tout moun.
Ministè Sante Piblik ak Popilasyon konfime 533 moun kontamine epi 21 deja mouri nan tout peyi a akoz kovid-19 la.
Kreyòl Enfo