Gwo tansyon nan katye Kafouyèy, aprè nouvèl lanmò « Tigrèg »

Pòtoprens, 10 janvye 2019.- Gwo zam fann fwa ap tire , kawoutchou ap boule depi nan mitan lanwit mèkredi pou rive jedi 10 janvye a prèske nan tout katye Kafoufèy ( Sid, Pòtoprens) depi aprè nouvèl lanmò polisye Gregory Antoine, moun plis konnen sou non « Tigrèg « .

Yon abitan nan zòn nan konfime pou Kreyòl Enfo  » tout moun oblije fèmen pòt kay yo akoz laperèz. Lekòl ak biznis pa fonksyone nan zòn nan. Nan tou fenèt kay la, mwen wè bandi yo ki pran kontwòl lari ak gwo zam fann fwa. Yo pa sispann tire depi yeswa. »

Daprè enfòmasyon yo, se chèf gang Savann Pistach la, Tije, yo sispèk ki ta tire Tigrèg aswè mèkredi 9 janvye a, tou prè komisarya Savann Pistach la.

Fanmi ak pwòch Tigrèg menase pou yo bloke tout zòn Kafoufèy la si yo pa jwenn kadav la.

Enspeksyon jeneral Lapolis la te mete deyò Gregory Antoine,Ti Grèg, nan enstitisyon an aprè non li te fin site nan rapò Rezo nasyonal k ap defann dwa moun yo (RNDDH) ak Fondasyon Je Klere (FJKL) kòm moun ki te patisipe nan masak Lasalin nan kote pou pi piti 71 moun te mouri, daprè RNDDH.

Kreyòl Enfo