Home Aktyalite Gwo malè pandye sou pwodiksyon sèl nan Latibonit

Gwo malè pandye sou pwodiksyon sèl nan Latibonit

by Kreyòl Enfo

Kreyòl Enfo, 12 jiyè 2019.- Peyizan k ap travay nan pwodiksyon sèl nan depatman Latibonit la sitou nan zòn Salin Raboto, Gonayiv, ap fè fas ak anpil difikilte nan dènye tan sa yo.

Pandan yon virewon Kreyòl Enfo fè nan rejyon an, sitwayen Limage Frantz k ap travay nan sektè a eksplike pwoblèm wout pou machin vin pran sèl la ansanm ak lapli ki pa tonbe se 2 pi gwo pwoblèm yo rankontre nan salin Raboto.

Limage Frantz ki raple pwodiksyon sèl se pi gwo mwayen yo genyen pou rantre yon ti lajan nan kanton an regrèt otorite nan Leta a pa bay okenn ankadreman ak pwodiktè ki nan rejyon an.

Bien-Aime Ralph Jacques Edouard, yon lòt peyizan ki gen basen pou pwodwi sèl, sou bò pal, plenyen pou travayè ki prèske pa genyen pou ede nan pwodiksyon an. Mouche Édouard fè kwè pi fò moun ki te konn travay nan sektè a kouri kite peyi a. Li regrèt genyen pami moun sa yo ki prefere pran kanmtè malgre malè ki pandye sou tèt yo nan mitan lanmè.

Peyizan an prevwa pwodiksyon sèl la kapab kraze nan Latibonit si otorite yo pa pote konkou ba yo nan sektè a.

Kreyòl Enfo

0 comment