Kreyòl Enfo, 16 septanm 2019.- Yon jèn gason tonbe anba bal, jodi lendi a (16), nan komin Kafou pandan premye jounen grèv jeneral kont lamizè ak pwoblèm gaz ki manke nan ponp yo.
Viktim nan ki rele Vladimir Fédé resevwa plizyè bal nan moman lapolis t ap tante retire barikad, kawotchou, gwo wòch ak fatra pwotestatè yo itilize pou bare lari a.
Manifestan yo lonje dwèt sou yon gwoup polisye (bakòp) k ap travay nan komisarya Omega (Kafou) yo di ki rèsponsab lanmò jèn gason sa. 2 lòt sitwayen soti blese tou pandan jounen mobilizasyon an.
Move kou kong, pwotestatè yo kalonnen ajan fòs lòd yo ak anpil kout wòch. Manifestan yo te vlope kadav Vladimir Fédé epi al depoze l devan komisarya Omega a. Pou gaye foul la, lapolis te itilize anpil gaz lakrimojèn. Pizyè sitwayen jwenn arèstasyon tou pandan jounen an.
Pandan tout jounen lendi a, tout aktivite te paralize nan kapital la ak plizyè lòt vil peyi a. Lekòl, biwo piblik, labank ak magazen pat fonksyone anpil kote nan peyi a.
Kreyòl Enfo