Kreyòl Enfo,16 septanm 2019.- Tout aktivite prèske bloke nan kapital la (Pòtoprens) ak komin ki antoure l yo, jodi lendi a (16), akoz grèv jeneral sendika chofè ak divès lòt sektè te lanse pou denonse pwoblèm gaz ki pa genyen nan ponp yo.
Maten an (7:30), kolaboratè Kreyòl Enfo k ap virewon nan zòn metwopolitèn Pòtoprens lan konstate pòt lekòl yo rete fèmen. Kèk grenn elèv ki te pran lari a byen bonè te oblije retounen lakay yo.
Transpò piblik la prèske pa fonksyone nan kapital la maten lendi an. Sitwayen ki pral regle aktivite yo oblije mache plizyè kilomèt oubyen peye motosiklèt. Se sèlman kèk grenn machin prive ki pran lari a.
Kawoutchou deja ap boule nan plizyè katye nan Pòtoprens. Zòn Nazon, pwotestatè yo mete gwo barikad pou bare wout. Anpil wòch ap tire nan zòn Pòtay Leyogàn.
Nan mache Kriswa, yon gwoup pwotestatè gaye nan mitan lari a tout bak machann yo konn mete machandiz pou vann. Endividi ki kache nan koridò ap tire wòch ak boutèy nan mache a tou.
Depi plis pase 2 semèn popilasyon an ap fè fas ak pwoblèm gaz ki pa genyen nan ponp yo. Yon sitiyasyon ki kreye gwo latwoublay kote sitwayen oblije ap mache ak galon nan tout lari pou bouske gaz.
Premye minis ki deja demisyone a, Michel Lapin, te anonse, yon bato gaz ta dwe rantre nan peyi a pandan jounen lendi a.
Kreyòl Enfo