Kreyòl Enfo 2 novanm 2020.- Yon gwoup sitwayen nan komin Abriko, depatman Grandans, mete lapat sou kat (4) jèn gason, jodi lendi a (2), ki te nan yon machin sispèk ak plak dominiken. Youn nan prezime bandi yo pèdi lavi l anba kout manchèt abitan nan zòn nan ki te move kou kong lanmè. Yo mare lòt twa yo epi remèt yo bay lapolis nan depatman Grandans la.
Daprè enfòmasyon yon abitan nan komin nan pataje ak redaksyon Kreyòl Enfo (KE), endividi ki te nan machin nan te genyen plizyè gwo zam fann fwa nan men yo. Li fè kwè jèn gason sa yo ta bandi k ap chèche tabli baz yo nan depatman an.
» Nou pa ka tolere bandi vin taye banda nan komin nan tankou y ap fè Pòtoprens « , pawòl yon abitan Abriko. Li rapouswiv pou di » si Leta pa pran rèsponsabilite l, nou (yo) menm n ap jere vagabon ».
Zak ensekirite yo pa sispann ogmante prèske nan tout peyi a pandan ane 2020 an. Pandan wikenn nan, bandi kidnape epi touye Evelyne Sincère, 21 lane, nan komin Dèlma (Lwès). Yon krim ki endiye prèske tout sosyete a k ap mande otorite yo sispann tete lang bandi.
Kreyòl Enfo