Kreyòl Enfo, 28 avril 2020 .- Pandan nouvo Kowonaviris la (Sars-cov-2) ap vale teren nan peyi a, nan vil Gonayiv, yon gwoup anplwaye Sant anbilansye nasyonal (CAN, sig nan lang franse) sakaje jodi madi a (28) sant otorite yo te prepare pou resevwa moun ki enfekte ak epidemi a, daprè sa kolaboratè Kreyòl Enfo nan depatman Latibonit la konstate.
Gwoup anplwaye sa yo komèt zak sa pandan yo t ap manifeste pou mande Leta peye yo lajan 3 lane ak 10 mwa travay depi yo pa janm touche. Pwotestatè yo kraze kabann, chèz ak lòt materyèl ki te nan sant izòlman an.
Pami anplwaye CAN ki t ap manifeste nan lari site lendepandans la te genyen chofè, sekouris, enfimye elatriye. Pwotestatè yo prevwa kontinye mobilize toutotan Leta pa peye yo.
Responsab lasante yo te konstwi sant izòlman pou malad Kovid-19 nan vil Gonayiv la tou lopital Lapwovidans.
Kreyòl Enfo