Gonayiv : sitwayen pran lari pou kondane eskonbrit ki te pete nan katedral la

Anba lobedyans sosyete sivil Gonayiv la, depatman Latibonit, yon gwoup sitwayen mache, jedi 15 novanm lan, nan lari site lendepandans la pou denonse eskonbrit kite pete anndan Katedral vil Gonayiv 4 novanm pase a.

Se te lokazyon pou pwotestatè yo te denonse tou zak ensekirite, lèse grennen ak koripsyon k ap taye banda nan vil la.

Kòdonatris depatmantal Platfom Fanm òganize pou devlopman Latibonit (PLAFODA), Louisette Vertilus ki tap patisipe nan mach la di li enpòtan pou tout sitwayen leve kanpe kont move zak sa yo ki kapab mete latwoublay nan a kominote a.

Responsab Platfòm pou sove Latibonit yo (PLASOLA) anonse y ap okipe beton an, dimanch 18 novanm kap vini la, pou fòse Leta ayisyen fè limyè sou lajan Petwokaribe a. Daprè kòdonatè Plasola a, Jacques Woubins Bordenave, mouvman sa ap fèt nan tèt kole ak yon dizèn lòt òganizasyon nan sosyete sivil la.

Eskonbrit sa pete anndan Katedral Gonayiv la, pandan selebresyon lamès fèt patwonal site lendepandans lan kote yon gwoup militan yo di ki se patizan senatè Youri Latortue te bastonnen responsab PLASOLA yo.

Jacques Roobens Bordenave ak Donald Saint Jean te soti blese.