Kreyòl Enfo, 15 desanm 2019 .- Chèf Leta a pase plizyè minit ak patizan l yo nan katye Dekawo, vil Gonayiv, nan lanwit samdi 14 desanm 2019 la. Prezidan Jovenel Moise fè vizit sipriz sa nan nan site lendepandans la pandan li t ap soti nan lantèman manman madanm li nan vil Pòdepè.
Kolaboratè Kreyòl Enfo nan depatman Latibonit la konstate plizyè santèn pati pouvwa a te reyini sou plas Petyon pou resevwa prezidan an. Pami patizan ki te prezan yo te genyen Polda, yon endividi ki fèmen nan prizon plizyè fwa. Daprè enfòmasyon yo, Polda ap dirije yon gwoup nèg ak zam k ap defann pouvwa Tèt Kale a nan katye Dekawo.
Pou reponn patizan l yo ki t ap mande arete Senatè Youri Latortue, chèf Leta a di li pap ankouraje yon ayisyen batay kont lòt. Jovenel Moise fè kwè misyon l se sitou rasanble tout moun epi mete peyi a sou ray devlòpman.
Anpil katouch t ap tire sitou nan katye Raboto pandan prezans Chèf Leta a nan vil Gonayiv.
Jovenel Moise ta dwe retounen Gonayiv premye janvye 2020 pou vin patisipe nan komemorasyon ofisyèl 216e lane endepandans peyi a.
Kreyòl Enfo