Kreyòl Enfo, 28 avril 2020 .- Depi aprè tantativ yon gwoup prizonye te fè pou sove nan prizon sivil Gonayiv 8 novanm 2019 la, otorite yo te deplase epi mete tout prizonye ki te nan lokal la nan prizon divès komin nan rejyon an.
Nan lide pou pèmet prizonye sa yo retounen nan prizon an, majistra vil la, Neil Latortue, anonse gen gwo travay k ap fèt nan lokal la ki nan zòn Byennak. Majistra bay garanti prizon an ap gen plis sekirite ak pi bon kondisyon pou prizonye yo.
« Nou ranfose travay yo aprè sak te rive ane pase a [tantativ pou sove]. Gen yon enjenyè ki la ak tout ekip li ap travay nan selil yo », daprè Neil Latortue ki presize « avan, lokal la te gen 7 selil, kounye a li pral 10 ».
Premye sitwayen site lendepandans ajoute « gen travay k ap fèt tou pou amelyore kondisyon prizon an tankou, pano solèy, batri pou inveter ak lòt materyèl ».
Plizyè dizèn prizonye otorite nan depatman an te deplase depi mwa novanm 2019 la, ta dwe retounen nan pi gwo prizon Gonayiv la pandan semèn nan.
Kreyòl Enfo