Gonayiv pa gen kouran depi 2 semèn, zak ensekirite yo ap ogmante

Abitan nan vil Gonayiv leve vwa yo byen wo pou mande responsab Elektrisite Ayiti yo ( EDH, sig nan lang fransè) fè yon mannyè pou bay kouran nan vil la. Blakawout ki blayi sou site lendepans la lakoz zak ensekirite yo ogmate, daprè kèk sitwayen.

Avoka militan Prophète Estimé kritike konpòtman responsab rejyonal EDH yo ki, daprè li, pa montre okenn respè pou sitwayen k ap peye Leta pou sèvis la. Mèt Estimé di li pa nòmal pou otorite yo pa janm bay popilasyon an okenn eksplikasyon sou rezon ki lakòz anpoul pa limen nan vil la depi plis pase 10 jou.

Malgre anpil tantativ nan telefòn, Kreyòl Enfo pa rive jwenn okenn reyaksyon nan bouch responsab EDH nan rejyon Latibonit la sou sitiyasyon sa.